Puri Jagannadh, in his podcast, shared fascinating insights on Japan’s secretive disappearance practice, Johatsu.
ప్రముఖ దర్శకుడు పూరి జగన్నాథ్ తన ‘పూరి మ్యూజింగ్స్’ పాడ్కాస్ట్లో ఎప్పటికప్పుడు విభిన్న, ఆసక్తికర అంశాలపై మాట్లాడుతుంటారు. తాజాగా ఆయన జపాన్లో ఉన్న ‘జొహుట్సు’ అనే విచిత్ర ఆచారాన్ని వివరించారు. అప్పులు, గృహ కలహాలు, పని ఒత్తిడితో సతమతమయ్యే వ్యక్తులు తమ ప్రస్తుత జీవితాన్ని విడిచిపెట్టి పూర్తిగా అదృశ్యమై కొత్త జీవితాన్ని ప్రారంభించాలనుకునే విధానమే ఇది. ప్రతి సంవత్సరం లక్షలాది మంది ఇలా రాత్రికి రాత్రే కనిపించకుండా పోతున్నారని పూరి చెప్పారు.
ఈ ప్రక్రియకు సహకరించే సంస్థలు కూడా జపాన్లో ఉన్నాయి. వీటిని ‘యొనిగేయ’ లేదా ‘నైట్ మూవర్స్’ అని పిలుస్తారు. వీరు వ్యక్తులను వారి ప్రస్తుత జీవితాల నుంచి తీసుకెళ్లి కొత్త పేర్లు, కొత్త నివాసాలు ఏర్పాటు చేసి రహస్యంగా స్థిరపడేలా చేస్తారు. పూరి పేర్కొన్నట్లు, ఇలాంటి సేవల కోసం రుసుము తీసుకుంటారు. కొందరు ఈ మార్గాన్ని ఎంచుకోక తప్పని పరిస్థితుల్లో ఉంటారని, కుటుంబ హింస నుంచి తప్పించుకునే మహిళలు ముఖ్యంగా ఇందులో భాగమవుతున్నారని చెప్పారు.
ఇలా అదృశ్యమైన వ్యక్తులు సామాన్య ఉద్యోగాలలో పని చేస్తూ, నగదు ద్వారా చెల్లింపులు చేసుకుంటూ జీవించాల్సి వస్తుంది. బ్యాంకు లావాదేవీలు, గుర్తింపు కార్డులు వాడకూడదన్న కఠిన నియమాలు ఉంటాయి. చట్టపరంగా ఇది నేరంగా పరిగణించబడుతుందని, ఎవరైనా పట్టుబడితే భారీగా జరిమానాలు విధిస్తారని పూరి హెచ్చరించారు. వీరిని వెతికేందుకు ప్రైవేట్ డిటెక్టివ్ సంస్థలు పనిచేస్తాయని తెలిపారు.
‘జొహుట్సు’పై మరింత సమాచారం తెలుసుకోవాలనుకునేవారికి ‘ఎవాపరేటెడ్’ అనే పాడ్కాస్ట్, డాక్యుమెంటరీలు ఉన్నాయి. పూరి ఈ విధానాన్ని విమర్శించకుండా, అది ఒక ఆత్మ రక్షణ మార్గంగా కొందరి దృష్టిలో ఉండొచ్చని అభిప్రాయపడ్డారు. “జొహుట్సు అనేది కేవలం ఓ మాయమైన జీవితం కాదు, అది ఓ కొత్త జీవితం వెతుక్కోవడమే” అని ముగించారు.
About the Author
